AGRADECEMENTOS

 

Hoxe, aínda que a gran maioría xa o sabedes, pois as boas noticias logo chegan, informamos que o pasado venres día 18 de outubro, por fin, a Xunta designou a praza do docente de Audición e Linguaxe (AL) e, para mellorar a semana, tamén nos foi aprobado o PROA, co cal, neste curso, conseguimos os recursos necesarios e que nos corresponden por LEI, iso si, despois de máis de un mes de escola.

Todo isto foi a base de loita, unha loita por un DEREITO que quixeron arrebatarlle aos nenos, e non sería posible sen a colaboración de todos e todas os que apoiaches todas as reivindicacións e que, dunha maneira ou doutra, estiveches cos nenos en todo momento.

Por iso, hoxe e sempre, desde a ANPA Cabo da Area, queremos DAR AS GRAZAS a todos os que fuches partícipes dalgunha maneira.

A tódolos e tódalas pais, nais, amigos e veciños que nos acompañaches desde o inicio nas convocatorias, que alzaches a voz polos nenos, que fixeches ruído xunto con nós.

A toda persoa da comunidade educativa e externa que asinou para solicitar o docente de AL, que xa vos explicamos a moitos a vital importancia del.

Á dirección do centro, porque sabemos que non foi sinxelo para eles e tamén loitaron por ilo.

Á corporación municipal, que se posicionou publicamente ao lado das familias e ao resto dos partidos, dos cales tivemos o seu apoio, a súa preocupación e non deixaron de loitar por nós.

Temos un especial agradecemento a Dani Pérez, por levar como levou o noso caso ao Parlamento Galego, por como loitou polo dereito dos nosos nenos, polas súa verbas que nos emocionaron.

Por iso, algunhas desas verbas, deixámosvolas hoxe aquí, para que non se esqueza.

As verbas de Dani Pérez no Parlamento

Queremos destacar a importancia de que as autoridades competentes cumpran co seu cometido, que é dotar aos centros educativos dos recursos necesarios e así garantir unha adecuada atención e o progreso de todo o alumnado. Non debería ser obriga das familias protestar e reivindicar, ano tras ano, o dereito dos nosos fillos a unha educación de calidade.

Agardamos que esta situación serva para que as autoridades tomen conciencia de que a súa xestión non está sendo axeitada, levando consigo a que máis da metade dos centros da Costa da Morte se mobilizaran na defensa dunha mellor xestión dos recursos educativos.

Por iso, hoxe e sempre, grazas.

AL É UN DEREITO, NON UN PRIVILEXIO!

MANIFESTO - 11/10/2024

 

Aquí vos deixamos o manifesto que limos na concentración do día 11/10/2024.

Seguimos en loita, non paramos e non temos pensado facelo. Queremos que se compartan as nosas verbas, que se saiba a realidade. Non calemos, é o que queren.

AL É UN DEREITO, NON UN PRIVILEXIO!!

Lectura do Manifesto

Boa tarde a todos e todas.

Hoxe, tristemente, estamos aquí por segunda vez para defender os dereitos dos nosos fillos e fillas.

A nosa presenza é, lamentablemente, unha necesidade, pois despois de un mes xusto desde o inicio do curso escolar, o noso centro segue sen contar co profesorado tan necesario de Audición e Linguaxe (AL). Parece ser que a administración prefire ignorar o problema abandonando a aqueles nenos que máis apoio necesitan.

ASÍ É SEÑORES E SEÑORAS!! Estamos asistindo, en vivo e en directo, á morte anunciada da educación inclusiva, vítima dunha neglixencia crónica por parte das autoridades.

Por iso seguimos, enfrontándonos a unha administración que semella tan ausente como o profesorado que NON ENVÍA.

Os mestre de AL non son meres apoios como nos queren facer crer, senón que son uns profesionais cruciais, moi importantes, para o desenvolvemento, a integración e o benestar dos nosos fillos.

Por iso a nosa loita, por manter o que nos corresponde POR LEI e POR DEREITOS.

Sen embargo, a pesar da súa importancia, a pesar do dereito que teñen os nenos e da obriga que teñen as administracións por lei de mandalo ao centro, o conselleiro de educación non fai máis ca mentir.

No congreso e en directo, diante dalgunhas das familias dos nosos nenos, preferiu evadir o tema falando da AP9 e doutros temas que nada teñen que ver coa educación e menos con este tema en concreto. Non quere falar do tema, négase, porque sabe que está incumprindo a lei, sabe que temos DEREITO e xa sabía que non o ía mandar. Tamén dixo que en Laxe tiñamos un PT de máis, como se iso resolvese o problema e dándose golpes de peito, como se lle tiveramos que agradecer que nos manda máis recursos dos necesarios, que afortunados somos!!!, e dicir que non, que iso é FALSO, minte e minte, e, como sempre, mintamos que algo queda. Por que dicimos e sabemos que é mentira? Porque en primaria temos un PT, certo, e en secundaria outro. Pero iso señor conselleiro, é por lei por ser un CPI, centro público integrado. Iso está no seu catálogo, no catálogo asinado por educación da Xunta xunto cos sindicatos e que é público e todos podemos ver.

Parece que non ten coñecemento que un AL e un PT teñen funcións totalmente diferentes, non son o mesmo, pero iso, señor conselleiro de educación, non ver a diferenza entre ambos, di moito do cargo que ocupa.

Tamén minte o señor presidente da Xunta, pois aínda saía dicindo onte na prensa que aumentaran os docentes nos centros mentres que os alumnos diminuíran, que se melloraran os ratios e achaca a falta dos AL e PT nos centros galegoss á tardanza do profesorado do Programa Europeo para a Orientación (PROA). Temos que dicir que os problemas que estamos tendo desde o inicio do curso escolar señor presidente, non, non son porque aínda non chegara o PROA, pois sabe de sobra que acostuma vir en outubro e marcha antes da finalización do curso, a cuestión é que outro docente que SI que tiña que enviar a Xunta e desde o inicio do curso tan importante como o AL, aínda non chegou e dada a resposta do seu conselleiro no parlamento, non ten traza de chegar nestes días. Un recurso que non depende dos ratios do alumno/mestre, senón que depende das necesidades, as cales lle foron transmitidas e foron ignoradas por vostedes. E sabe que a lei di que teñen que enviar dito mestre si ou si.

Por iso señores e señoras, HAI QUE LOITAR, que non recorten, que cumpran a lei, non pedimos nada extraordinario, só unha educación digna e inclusiva.

E como o señor conselleiro sabe que minte, desvía os temas a outros como a AP9, temas que nada teñen que ver coa situación real dos nosos nenos, agardando que nos distraiamos con esas historias, que calemos, que veña a calma entre os pais e así queda todo no esquezo. Pois non, así non se calman as augas, por iso continuamos coa nosa reivindicación. Non nos vai despistar e non imos permitir que se continúe ocultando as carencias educativas que afectan ao máis prezado que temos, os nosos fillos e fillas.

E así, mentres a administración decide xogar ao despiste, os nosos nenos e nenas están perdendo valiosas oportunidades de aprendizaxe e socialización. A falta de profesorado de AL supón unha brecha inxusta na súa formación e afecta tamén ao resto do alumnado e profesorado, pois un centro incompleto non pode ofrecer un ensino de calidade.

Este é UN PROBLEMA REAL e a solución non pode ser ignoralo ou finxir que non é tal.

Semella que a educación inclusiva da que tanto presume nos discursos non é máis ca unha mentira cómoda para calmar conciencias. Por iso vimos nos xornais titulares de novas anunciando contratación de docentes, pero preguntémonos onde están eses docentes.

Ben, o que nos preguntamos é, se así é como saen nas novas a nivel Galicia, por que a nivel local non fan máis ca saír centros de toda Galicia con recortes en profesorado? Por que non, non somos nós só, está toda Galicia, as catro provincias, tamén nas cidades como Santiago, A Coruña, Vigo, Pontevedra e os que non sabemos.

Isto déixanos sensación de impotencia, pois as novas da falta de recursos só saen nos xornais a nivel local, ocultando unha realidade sombría do que realmente está acontecendo. As autoridades teñen unha falta de compromiso pola súa parte cando son os que deberían velar polo benestar educativo.

Preguntémonos entón, que clase de inclusión é esta que se predica tanto nos discursos oficiais, pero que morre no día a día dos nosos centros educativos?

ESTAMOS FARTOS DE PALABRAS VALEIRAS E DE PROMESAS INCUMPRIDAS

Non queremos titulares que pinten un panorama ideal, queremos SOLUCIÓNS REAIS E INMEDIATAS PARA OS NOSOS FILLOS E FILLAS.

Non deixaremos que a educación inclusiva se converta nun mero eslogan sen contido, queremos que sexa unha realidade. Non pararemos ata que o noso centro conte cos medios necesarios para garantir que cada neno e cada nena reciba a atención que merece. Estamos aquí, non só polos nosos fillos e fillas, senón tamén polo dereito de todos a unha educación xusta e completa. E se temos que continuar manifestándonos seguiremos, faremos ruído, queremos que se nos escoite, que se escoiten as

necesidades reais dos nenos e, algo moi simple, QUE SE CUMPLA A LEI! Se temos que estar aquí tódolos días, aquí estaremos. Non imos aceptar máis escusas nin máis evasivas.

Por unha educación digna e inclusiva!

Polos dereitos dos nosos nenos e nenas!

Non queremos máis desculpas, queremos solucións.

AL É UN DEREITO NON UN PRIVILEXIO!!!!!

 

FAITE SOCIO!!

 

Carta de Presentación  da ANPA Cabo da Area

Estimados pais e nais dos alumnos do C.P.I. Cabo da Area de Laxe.

Esta nota é para informarvos da recente renovación do equipo da Xunta Directiva da ANPA Cabo da Area para o curso 2024/25.

Somos un equipo novo con moita ilusión e ganas de levar a cabo diversos proxectos e actividades para mellorar a calidade educativa dos nosos fillos e fillas.

Como faremos isto?

Pois queremos que os antigos socios sigan continuando na ANPA e, se aínda non es socio, gustaríanos que nos deras un voto de confianza facéndote, porque xuntos poderemos levar a cabo as ideas e os proxectos que xuran e ter así capacidade de traballo para xerar cambios e que estes sexan visibles.

A cota para formar parte da ANPA é de 15€ con carácter anual.

Necesitamos o teu asociacionismo para poder dispoñer de orzamento e que así sexa posible a organización de actividades para o alumnado do centro. Non queremos ter ideas e que queden niso, en ideas, queremos conseguir que a execución das mesmas sexa posible, pero só será posible xuntos.

Queremos ser un ANPA dinámica, que resolva problemas educativos como os que nos están afectando agora mesmo polos recortes sufridos en educación e que, ao mesmo tempo, faga algunha dinámica co alumnado, para que connosco tamén o pasen ben, desfruten e se formen.

Comezamos esta nova andaina con moita ilusión e por iso queremos contar contigo.

Únete a nós, sexamos unha ANPA forte.

Podes descargar a ficha de inscripción no seguinte enlace:

Ficha

Podes cubrila e enviala xunto co xustificante bancario ao correo electrónico anpacabodaarea@gmail.com ou en man a calquera membro da directiva.

Atentamente,

 

A dirección

RECUPEREMOS O CONTACTO

ESTAMOS DE VOLTA!!!!

Hoxe só queremos comentar que imos retomar a actividade do blog da ANPA. 

Poñeremos as novas, iremos dando información que tamén compartiremos nas nosas redes sociais, así que, ESTADE ATENTOS!!!

Pois iso, un pequeno saudiño para que esteades ao tanto do que está acontecendo no día a día da ANPA Cabo da Area.

valoración das mobilizacións contra a LOMCE

A federación de ANPAs da Costa da Morte, integrada dentro da Plataforma Galega en Defensa do Ensino Público, quere expresar a súa satisfacción polo desenvolvemento das mobilizacións contra a LOMCE e os recortes no ensino público na Costa da Morte. Hoxe confluíron na folga do ensino, o paro convocado polas organizacións estudiantís, profesorado  e  a solidariedade das epais. Unha folga que afecta a todos os niveis educativos e nos que o paro foi secundado masivamente pola comunidade educativa

Unha vez máis (esta é a segunda vez que o ensino esixe de maneira rotunda e unánime a retirada da contrarreforma educativa) a participación das familias, profesorado e alumnado, nunha mañá de dioivo que empapou os nosos corpos, baleirou as aulas nos centros de ensino público na Costa da Morte contra a LOMCE. Unha lei que está ao servizo da exclusión social e da desigualdade.

Con iso amosamos que as ANPAs da Costa da Morte non imos permanecer caladas unha vez que a LOMCE xa pasou o trámite parlamentario do Congreso e  foi enviada ao Senado. Non debemos esquecer que a  LOMCE pretende expulsar do ensino a unha boa parte do alumnado (o que teña menos recursos), avanza na confesionalidade e na privatización do ensino e é unha lei profundamente españolizadora , que nega o dereito ao ensino en galego, e mesmo pretende rebaixar a calidade educativa que o alumnado galego está a recibir na actualidade.

Para a federación de ANPAs da Costa da Morte sabemos que é unha lei que nace cos días contados e que vai directamente contra o corazón do sistema educativo público. Por iso afirmamos que o conselleiro e o ministro de Educación son moi merecentes destes agasallos reivindicativos en forma de mobilización masiva contra a LOMCE. Esa lei da que só agardamos a súa retirada, por nacer cun diagnóstico de morte inmediata.

Xosé Antón de la Fuente Subiela,

Presidente da federación de ANPAs da Costa da Morte

Manifesto da Cultura Galega contra a LOMCE

Asina contra a LOMCE se pertences ao ámbito cultural ou a algunha asociación que desenvolva a súa labor nese ámbito

O sistema educativo que impón a LOMCE é un sistema afastado do noso país, da nosa cultura, da nosa historia e da nosa lingua, é dicir, de todo aquilo que nos conforma como pobo. Un sistema que pretende formar persoas desarraigadas que non se recoñezan no contexto que as rodea, converténdoas en analfabetas na cultura e mesmo na lingua que este país creou ao longo dos séculos.    

Un sistema educativo público debe estar ao servizo das necesidades do país ao que pertence e debe estar vehiculizado  na lingua propia para  formar na súa cultura e para a súa cultura. A LOMCE pretende alienar e uniformar o alumnado galego cun traxe españolizador que lle impida recoñecerse como galego e coñecer a obra dos seu propio pobo e das e dos que singularmente destacan nel como creadores excepcionais.

Rexeitamos un sistema educativo que educa as persoas para ser emigrantes e que desvaloriza o propio como inservíbel e desapropiado. Non é posíbel respectar a diversidade, avanzar e mesmo construír outro mundo se non se fai desde o coñecemento e a estima do propio.

O sistema educativo debe ter como obxectivo prioritario o de dotar as xeracións futuras das ferramentas necesarias para se poidan educar na capacidade de análise crítica, no razoamento científico e desprexuizado, no laicismo, na solidariedade, na igualdade, na xustiza social, na equidade, no exercicio da democracia e da liberdade de expresión para  así contribuír á transformación social, necesaria para conseguir unha sociedade máis xusta e igualitaria.

Por iso, as e os que a seguir asinamos, persoas ligadas á cultura galega, reclamamos a retirada da LOMCE

FOLGA E MANIFESTACIÓNS CONTRA A LOMCE 24 DE OUTUBRO

Dende federación de  ampas da Cosa da Morte animan a secundar a folga do vindeiro día 24 e a participar manifestándonos contra a LOMCE.

As anpas, federación de anpas, profesorado, alumnado, sindicatos de ensinantes, plataforma galega ou colectivos en defensa do Ensino Público e os diversos sindicatos de estudantes, como membros  da comunidade educativa, estamos mobilizándonos contra os recortes no Ensino. A cada paso fomos  acadando máis  apoio social e creando conciencia necesaria para defender e potenciar o ensino como garantía dunha sociedade máis xusta que loita contra as desigualdades e busca garantir a formación das novas xeracións. O obxectivo, como dixemos outras veces, é claro: na defensa do Ensino Público loitamos polo futuro das nosas fillas e fillos, das fillas e fillos do noso País.

Continuamos e así continuaremos animándovos a non deixarse levar polo desánimo diante das descualificacións que estamos a recibir, do ministro Wert, os distintos colectivos que estamos loitando contra a implantación da LOMCE.

 A recente constitución da federación da Costa da Morte permitiu a organización colectiva das anpas de Bergantiños, Soneira e Fisterra, Costa da Morte para seguir pelexando polos dereitos do alumnado, das nosas fillas e fillos, de xeito colectivo e coa suficiente capacidade de auto- organización. Dese xeito, e colaborando con outras federacións de Anpas Galegas, poidamos manter e mellorar un sistema público de ensino axeitado ás necesidades da xente nova do noso País.

E nesa pelexa animamos  a participar na folga xeral contra a LOMCE o 24 de outubro e no tempo que resta até ese día, podamos  explicar as razóns que nos levan a rexeitar ese pernicioso proxecto de lei.

Manifestacións contra a LOMCE na Costa da Morte:

Carballo: praza do Concello, ás 11:30 h.

Cee: praza 8 de Marzo, ás 11:30 h.